ბრიტანულ-ქართული აკადემიის გუნდი

მარინე ჯიბღაშვილი ბრიტანულ-ქართულ აკადემიაში 2014 წლიდან მუშაობს და VI-VIII კლასებში ქართულ ენასა და ლიტერატურას ასწავლის. დაამთავრა თბილისის სახელმწიფო უნივერსიტეტის ფილოლოგიის ფაკულტეტი ქართული ენისა და ლიტერატურის სპეციალობით. საგანმანათლებლო სისტემის სხვადასხვა საფეხურზე ოცდაათწლიანი გამოცდილება აქვს, ფლობს თანამედროვე მეთოდებს, აქტიურად იყენებს ტექნოლოგიებს და საერთაშორისო კურიკულუმით მუშაობის გამოცდილება აქვს; არის სასწავლო რესურსების ავტორი და წიგნების რედაქტორი. მარინესთვის უმნიშვნელოვანესია ნდობასა და პატივისცემაზე დაფუძნებული ურთიერთობა და სივრცე, სადაც ბავშვს შეცდომის არ ეშინია და იცის, რომ მისი აზრი ღირებულია.

ნინო მხეიძე ბრიტანულ-ქართულ აკადემიაში IX, XI და XII კლასებში ქართულ ენასა და ლიტერატურას ასწავლის; აკადემიაში 2010 წლიდან მუშაობს. თბილისის სახელმწიფო უნივერსიტეტის აღმოსავლეთმცოდნეობის ფაკულტეტზე მაგისტრის ხარისხი მოიპოვა, აქვს 25-წლიანი პედაგოგიური გამოცდილება და უფროსი მასწავლებლის სტატუსი. 2009 წლიდან შეფასებისა და გამოცდების ეროვნულ ცენტრში თხზულებების გამსწორებელია, იყო სახელმძღვანელოების გრიფირების კომისიის წევრი და მასწავლებელთა სახლის ტრენერი. მისთვის მნიშვნელოვანია, მოსწავლეები ჰუმანურ, პასუხისმგებლიან და კრიტიკულად მოაზროვნე მოქალაქეებად გაიზარდონ და ქართული ლიტერატურა საკუთარი კულტურის ნაწილად აღიქვან. უყვარს ბუნება და კითხვა.

ნინო მარდალეიშვილი ბრიტანულ-ქართულ აკადემიაში საბაზო საფეხურზე მათემატიკას ასწავლის და STEM მიმართულების ექსპერტია. თბილისის სახელმწიფო უნივერსიტეტის კიბერნეტიკისა და გამოყენებითი მათემატიკის ფაკულტეტზე მაგისტრის ხარისხი მოიპოვა, ფლობს უფროსი მასწავლებლის სტატუსს. 30-წლიანი პედაგოგიური გამოცდილება აქვს, მუშაობდა „ათასწლეულის სკოლაში“, „აიბი მთიებსა“ და საჯარო სკოლებში. არის მათემატიკის სახელმძღვანელოებისა და მასწავლებელთა ტრენინგმოდულების ავტორი, GeoGebra-ზე დაფუძნებული ინტერაქტიული ტრენაჟორების შემქმნელი და საერთაშორისო კონფერენციების მომხსენებელი. მისი მიზანია ცოცხალი, ინტერაქტიული გაკვეთილი, რომელიც კრიტიკულ და შემოქმედებით აზროვნებას ავითარებს. თავისუფალ დროს პიანინოსა და გიტარაზე უკრავს.

ნატალია შანიძე ბრიტანულ-ქართულ აკადემიაში IX-XII კლასების მათემატიკის მასწავლებელი და საფეხურის ხელმძღვანელია. აკადემიაში 2008-2018 წლებში მუშაობდა და 2022 წლიდან კვლავ გუნდის წევრია. თბილისის სახელმწიფო უნივერსიტეტის მექანიკა-მათემატიკის ფაკულტეტზე მაგისტრის ხარისხი მოიპოვა; მუშაობდა „ათასწლეულის სკოლაში“, წმინდა გიორგის სახელობის საერო სკოლასა და თბილისის ტექნიკურ უნივერსიტეტში. იყო განათლების ხარისხის განვითარების ეროვნული ცენტრის მათემატიკის ექსპერტი და სახელმძღვანელოების რეცენზენტი, მონაწილეობდა ეროვნული სასწავლო გეგმის შემუშავებაში. მისთვის მთავარია ლოგიკური აზროვნების განვითარება და გარემო, სადაც მოსწავლე შეცდომებისგან სწავლობს. უყვარს თეატრი, მუსიკა და ქართული ფოლკლორი.

ნინო ქაჯაია ბრიტანულ-ქართული აკადემიის მუსიკის მასწავლებელია და VI-VIII კლასებს ასწავლის. 1989 წელს თბილისის სახელმწიფო კონსერვატორიის მაგისტრატურა დაამთავრა. მუშაობდა სულხან-საბას პედაგოგიური უნივერსიტეტის მუსიკის კათედრის უფროს მასწავლებლად, ბაკურ სულაკაურის საავტორო სკოლაში, „მწვანე სკოლაში“, ნიუტონის თავისუფალ სკოლასა და ილიაუნის თეატრალურ ფაკულტეტზე; აკადემიაში 2016 წლიდან ასწავლის. იყო მასწავლებელთა სახლის მუსიკის ტრენერი და განათლების სამინისტროს ექსპერტი, 2018 წლიდან შეფასებისა და გამოცდების ეროვნული ცენტრის მუსიკის შემფასებელია. აკადემიაში Broadway Junior-ის სპექტაკლების მუსიკალური ხელმძღვანელია; ეს სპექტაკლები ბირმინგემის საერთაშორისო ფესტივალის არაერთგზის გამარჯვებულია. უყვარს მოგზაურობა.

ნატა ბაღაშვილი ბრიტანულ-ქართულ აკადემიაში IV-XII კლასებში რუსულ ენას ასწავლის. დაამთავრა თბილისის პუშკინის სახელობის პედაგოგიური ინსტიტუტი და რუსულ ენას 43 წელია ასწავლის: 1983-2010 წლებში რუსთავის №17 საჯარო სკოლის მასწავლებელი და კათედრის ხელმძღვანელი იყო, შემდეგ კერძო სკოლა „რეცაში“ მუშაობდა, 2015-2021 წლებში კი საქართველოს სახელმწიფო ელექტროსისტემის რუსული ენის ტრენერი იყო. ფლობს უფროსი მასწავლებლის სტატუსს და მოსკოვის ლომონოსოვის უნივერსიტეტის სერტიფიკატს. მისი რწმენით, მთავარი მზა ფაქტების გადმოცემა კი არა, დამოუკიდებლად აზროვნების სწავლებაა. უყვარს კითხვა, მუსიკა და მოგზაურობა.

გვანცა მანძულაშვილი ინგლისური ენის მასწავლებელია ათწლიანი გამოცდილებით. ბრიტანულ-ქართული აკადემიის გუნდს 2022 წელს შეუერთდა და VII-X კლასებში ასწავლის, მათ შორის Cambridge IGCSE First Language English-ის პროგრამას. აქვს ანგლისტიკის ბაკალავრისა და მაგისტრის ხარისხები, Cambridge CAE სერტიფიკატი, IGCSE-ის სწავლებისა და TEFL-ის სერტიფიკატები. იკვლევს პოლიტიკურ დისკურსსა და მეტაფორას: მონაწილეობდა კვლევაში ბორის ჯონსონის პანდემიური გამოსვლების ომის მეტაფორების შესახებ. გვანცასთვის მთავარია უსაფრთხო და საინტერესო გარემო, რომელიც მოსწავლის ინდივიდუალურ საჭიროებებს ერგება და დამოუკიდებელ აზროვნებას აძლიერებს. თავისუფალ დროს კითხულობს და ფოტოებს იღებს.

სალომე ბუბუტეიშვილი ბრიტანულ-ქართული აკადემიის ინგლისური ენისა და ლიტერატურის მასწავლებელია: VI და VIII კლასებში Cambridge-ის პროგრამით ასწავლის, XI-XII კლასებში კი IB-ის Language A: Language and Literature-ის კურსს უძღვება. ფლობს ინგლისური ფილოლოგიის მაგისტრის ხარისხს, სწავლების გამოცდილება საქართველოსა და საერთაშორისო სივრცეში, დაწყებითი საფეხურიდან უნივერსიტეტამდე აქვს დაგროვილი. სალომესთვის მთავარია გარემო, სადაც მოსწავლე თავისუფლად გამოხატავს აზრს და კრიტიკულად აზროვნებს, ლიტერატურა კი ცოცხალი ორგანიზმია და არა თაროზე დალაგებული დეკორი. ყველაზე დიდ ჯილდოდ იმ „აჰა“ მომენტებს მიიჩნევს, როცა მოსწავლე საკუთარ თავს აღმოაჩენს.

ქეთი კურმაშვილი ბრიტანულ-ქართულ აკადემიაში VI-X კლასებში ინგლისურს ასწავლის Cambridge Lower Secondary-ისა და IGCSE-ის პროგრამებით. ინგლისური ენის სწავლების შვიდწლიანი გამოცდილება აქვს, მათ შორის ოთხი წელი IB სკოლის PYP და MYP პროგრამებში. არის Cambridge-ის სერტიფიცირებული მასწავლებელი და მუდმივად ზრუნავს პროფესიულ განვითარებაზე. ქეთისთვის მნიშვნელოვანია საკლასო გარემო, სადაც მოსწავლეები თავს თავდაჯერებულად გრძნობენ, კითხვებს სვამენ, შეცდომებს უშვებენ და სწავლას საკუთარი შესაძლებლობების აღმოჩენად აღიქვამენ. მას სწამს, რომ მასწავლებლის როლი ცოდნის გადაცემით არ შემოიფარგლება. უყვარს ცეკვა და აქტიური ცხოვრების წესი.

ლელა ფაიქიძე ბრიტანულ-ქართულ აკადემიაში IB ფსიქოლოგიას ასწავლის და სპეციალური განათლების (SEN) მასწავლებელია: უფროსკლასელებს კვლევებში ხელმძღვანელობს და მოსწავლეებს ინდივიდუალურად უჭერს მხარს. განათლება ფსიქოლოგიისა და განათლების მიმართულებით მიიღო, გავლილი აქვს IB-ის ტრენინგები და სპეციალური განათლების პროგრამები, მათ შორის ABA, PECS და არტთერაპია. მრავალწლიანი გამოცდილება აქვს, სახალხო დამცველის აპარატში მონიტორინგის ექსპერტად მუშაობდა. სწავლების ფილოსოფია რიტა პირსონის ხედვას ეფუძნება: ყველა ბავშვს სჭირდება ზრდასრული, რომელიც მასზე ხელს არასოდეს ჩაიქნევს. სკოლის მიღმა British Scouting Overseas-ის მოხალისე ლიდერია და ფორტეპიანოზე უკრავს.

ელზა ხაინდრავა ბრიტანულ-ქართულ აკადემიაში VI-IX კლასებში ისტორიას, „ჩვენს საქართველოსა“ და გეოგრაფიას ასწავლის. თბილისის სახელმწიფო უნივერსიტეტში ისტორიის ბაკალავრისა და კავკასიოლოგიის მაგისტრის ხარისხები მოიპოვა, ამჟამად ილიას სახელმწიფო უნივერსიტეტში განათლების ადმინისტრირებას სწავლობს. 2013-2019 წლებში თსუ-ს მოწვეული პედაგოგი იყო, არის საერთაშორისო ჟურნალებში გამოქვეყნებული სტატიებისა და ეპიგრაფიკული ძეგლების მონოგრაფიის თანაავტორი. ფლობს უფროსი მასწავლებლის სტატუსს და აკადემიის გუნდს 2021 წელს შემოუერთდა. ელზას სწამს, რომ ისტორია თარიღების დაზეპირება არ არის, მთავარია წარსულის თანამედროვეობასთან დაკავშირება. მართავს საგანმანათლებლო პლატფორმას „EdLab“.

კრისტინე ხოხობაშვილი ბრიტანულ-ქართულ აკადემიაში I-X კლასების სპორტის მასწავლებელია. დაამთავრა თბილისის სახელმწიფო უნივერსიტეტის ფსიქოლოგიისა და განათლების მეცნიერებათა ფაკულტეტი, რაც მოსწავლეთა ინდივიდუალური საჭიროებების გააზრებაში ეხმარება. 2022 წლიდან საერთაშორისო სპორტული ღონისძიებების ორგანიზებაშია ჩართული და საქართველოს ქალთა ასაკობრივი საკალათბურთო ნაკრებების ასისტენტ მწვრთნელად მუშაობდა. კალათბურთით 11 წელია აქტიურად არის დაკავებული და სწორედ ამ გამოცდილებამ დაანახა, რომ სპორტი გუნდურობას, დისციპლინასა და საკუთარი შესაძლებლობების რწმენას აყალიბებს. ყველაზე მეტად მოსწავლეების პროგრესისა და თავდაჯერებულობის ზრდის დანახვა ამოტივირებს.

ლევან ჭუმბურიძე ბრიტანულ-ქართული აკადემიის ICT-ის მასწავლებელია. ფსიქოლოგიის განათლება ილიას სახელმწიფო უნივერსიტეტსა და თბილისის სასულიერო აკადემიაში მიიღო, შემდეგ „ინფორმაციული ტექნოლოგიების აკადემიაში“ პროგრამირება შეისწავლა და დეველოპერის კვალიფიკაცია მოიპოვა. სწავლების ხუთწლიანი და რეალურ ვებპროექტებზე მუშაობის მდიდარი გამოცდილება აქვს. აკადემიის პარალელურად გლდანის პროფესიულ კოლეჯში Front-End დეველოპმენტს ასწავლის და განათლების სამინისტროს IT სტანდარტების სამუშაო ჯგუფშია ჩართული; არის სასწავლო კურსის „ვებგვერდის ინტერფეისის მოდელირება“ ავტორი, 2025 წელს კი ესტონეთის პროფესიულ კოლეჯებში კოლეგებს გამოცდილება გაუზიარა. ლევანისთვის მთავარია პრაქტიკული უნარები და პრობლემების დამოუკიდებლად გადაჭრა.

კესო კოზმავა ბრიტანულ-ქართულ აკადემიაში IB სადიპლომო პროგრამისა და IGCSE-ის ბიოლოგიის კურსს უძღვება. ბიოლოგიის სწავლების ათწლიანი გამოცდილება აქვს საერთაშორისო და ადგილობრივ სკოლებში, მუშაობდა მოლეკულური დიაგნოსტიკის, ლუგარისა და ბერიტაშვილის კვლევით ცენტრებში, ამჟამად საქართველოს უნივერსიტეტის მოწვეული ლექტორია. თბილისის სახელმწიფო უნივერსიტეტი წარჩინებით დაამთავრა, ბიოქიმიის მაგისტრის ხარისხი წითელი დიპლომით მოიპოვა და პრეზიდენტის სტიპენდიანტი იყო. ფლობს უფროსი მასწავლებლის სტატუსს, IB DP-ისა და Cambridge-ის სერტიფიკატებს; არაერთი სამეცნიერო ნაშრომის თანაავტორია და 2022 წლიდან FENS-ის წევრია. კესოსთვის მასწავლებლობა მოსწავლის შესაძლებლობების გამოვლენასა და მხარდაჭერას ნიშნავს.

ქეთი იორამიშვილი ბრიტანულ-ქართულ აკადემიაში IV-XII კლასებში გერმანულ ენას ასწავლის და უცხოური ენების კათედრას ხელმძღვანელობს. გერმანული ენის სწავლების თხუთმეტწლიანი გამოცდილება აქვს საქართველოსა და გერმანიაში, მათ შორის IB DP-სა და IGCSE German-ის პროგრამებზე. ბაკალავრისა და მაგისტრის ხარისხები ფრანკფურტის გოეთეს უნივერსიტეტში მიიღო, ფილოლოგიის დოქტორის ხარისხი კი საქართველოს ტექნიკურ უნივერსიტეტში. არის წამყვანი მასწავლებელი და IB DP-ის სერტიფიცირებული პედაგოგი, სამეცნიერო სტატიების ავტორი, მუშაობდა მასწავლებლის სახლის ტრენერად და გერმანული ენის სახელმძღვანელოების რეცენზენტად. უყვარს ლიტერატურა, მხატვრობა და მოგზაურობა.

თამარ ძინძიბაძე ბრიტანულ-ქართულ აკადემიაში ჰუმანიტარულ მეცნიერებათა დეპარტამენტის ხელმძღვანელი, ისტორიის პედაგოგი და IB DP-ის CAS-ის კოორდინატორია; VII, X და XII კლასებს საქართველოსა და მსოფლიოს ისტორიას ასწავლის. 2002 წელს თბილისის სახელმწიფო უნივერსიტეტის აღმოსავლეთმცოდნეობის ფაკულტეტზე ისტორიის მაგისტრის ხარისხი მოიპოვა, სწავლობდა დამასკოსა და კაიროს უნივერსიტეტებში. აკადემიაში 2010 წლიდან მუშაობს. გავლილი აქვს IB-ის კურსები TOK-სა და CAS-ში; 2023 წელს სტოკჰოლმში ნობელის პრემიის მუზეუმის მასწავლებელთა სამიტზე მონაწილეობდა, ტრენინგები გერმანიასა და ნორვეგიაშიც გაიარა. თითქმის ყველა კონტინენტი აქვს მოვლილი და ეთნოგრაფიით არის გატაცებული.

ირმა მარღანია ბრიტანულ-ქართული აკადემიის ICT-ისა და Computer Science-ის მასწავლებელი და ამ მიმართულების ხელმძღვანელია; საგნებს DP და IGCSE საფეხურზე ასწავლის. ილიას სახელმწიფო უნივერსიტეტში ინგლისური ფილოლოგიის მაგისტრის ხარისხი მოიპოვა, საქართველოს ტექნიკურ უნივერსიტეტში კი ბიზნესის ადმინისტრირების ბაკალავრისა. გავლილი აქვს DP Computer Science-ის, CLIL-ისა და Google Workspace for Education-ის კურსები. ათ წელზე მეტია განათლებაში მუშაობს: European School-სა და Buckswood-ში ასწავლიდა, 2021 წლიდან აკადემიის გუნდის წევრია, 2025 წლიდან კი IB-ის გამოცდების გამსწორებელი. ირმასთვის მთავარია გარემო, სადაც მოსწავლეები ექსპერიმენტებს ატარებენ.

ლანა ჯღარკავა ბრიტანულ-ქართულ აკადემიაში X-XII კლასებში ინგლისურ ენას ასწავლის. სწავლების 17-წლიანი გამოცდილება აქვს სკოლებში, უნივერსიტეტებსა და საერთაშორისო ცენტრებში, მათ შორის თბილისის სახელმწიფო უნივერსიტეტსა და International House Tbilisi-ში. 2021 წელს თსუ-მ ინგლისური ფილოლოგიის დოქტორის ხარისხი მიანიჭა, 2013 წელს კი ბრიტანეთმცოდნეობის მაგისტრისა. ფლობს უფროსი მასწავლებლის სტატუსს, IB-ის სერტიფიკატებს, Cambridge CELTA-სა და TKT-ს; არის კოგნიტიური სტილისტიკისა და პოლიტიკური დისკურსის კვლევების ავტორი. ლანასთვის მთავარია მოსწავლეებში სწორი ღირებულებებისა და კრიტიკული აზროვნების ჩამოყალიბება, ენა კი მისთვის მუდმივი კვლევის თემაა.

ლევან ხუციშვილი ბრიტანულ-ქართულ აკადემიაში ასწავლის IB Theory of Knowledge-ს, IB ESS-ს, IGCSE Global Perspectives-სა და IGCSE Geography-ს. თბილისის სახელმწიფო უნივერსიტეტში საერთაშორისო ურთიერთობების ბაკალავრისა და საჯარო მმართველობის მაგისტრის ხარისხები მოიპოვა, 2024 წელს Tallinn University-ში Educational Innovation and Leadership-ის მიკროხარისხი მიიღო. 10 წელზე მეტია განათლებასა და ახალგაზრდულ პროექტებში მუშაობს: იყო თსუ-ს მოწვეული ლექტორი, British University in Georgia-ის Political Science-ის პროგრამის ხელმძღვანელი და Save the Children Georgia-ის პროექტების ოფიცერი; 2015 წლიდან ორგანიზაცია „გერგარტის“ დირექტორია.

ელენე რომელაშვილი ბრიტანულ-ქართულ აკადემიაში IX-XII კლასებში ბიზნესს ასწავლის. ბაკალავრის ხარისხი გამოყენებით მათემატიკაში თბილისის სახელმწიფო უნივერსიტეტში მიიღო, შემდეგ დაამთავრა ინდუსტრიული მათემატიკის მაგისტრატურა მიჩიგანის სახელმწიფო უნივერსიტეტში, MBA ცენტრალური ევროპის უნივერსიტეტში და განათლების მეცნიერებების მაგისტრატურა გრონინგენის უნივერსიტეტში. 2009-2018 წლებში აკადემიაში IGCSE Business Studies-ს, Economics-სა და A-Level Mathematics-ს ასწავლიდა, მათემატიკასა და ეკონომიკას კი მიჩიგანის სახელმწიფო უნივერსიტეტის სტუდენტებს. ელენეს სწამს, რომ ყველა მოსწავლეს შეუძლია სასურველი შედეგის მიღწევა, საკუთარ როლს კი ფასილიტატორად ხედავს. უყვარს მრავალდღიანი ლაშქრობა, თხილამურები და არტჰაუსული კინო.

მაგდა ბობოხიძე ბრიტანულ-ქართულ აკადემიაში IX-XI კლასებში ეკონომიკას, IX-X კლასებში კი ბიზნესს ასწავლის. ბაკალავრის ხარისხი ბიზნესის ადმინისტრირებაში თავისუფალ უნივერსიტეტში მიიღო, 2023 წელს კი ISET-ის ეკონომიკის სამაგისტრო პროგრამა დაამთავრა. იყო თავისუფალი უნივერსიტეტის ეკონომიკის ლექტორი და GELi-ის ფარგლებში მასწავლებელთა ტრენინგებს ატარებდა. არის ეკონომიკური საგანმანათლებლო პლატფორმა „ორჯერ ორის“ დამფუძნებელი. სწავლებაში ყველაზე მეტად ის მომენტი მოსწონს, როცა რთული კონცეფცია კლასში მარტივი და გასაგები ხდება. თავისუფალ დროს ვიდეოებს იღებს და ამონტაჟებს.

ლევან პავლიაშვილი ბრიტანულ-ქართულ აკადემიაში მათემატიკას ასწავლის კემბრიჯის საერთაშორისო და IB სადიპლომო პროგრამებზე. კომაროვის ფიზიკა-მათემატიკის სკოლის კურსდამთავრებულია, თბილისის სახელმწიფო უნივერსიტეტში ფსიქოლოგიის ბაკალავრის ხარისხი მოიპოვა, ამჟამად ილიას სახელმწიფო უნივერსიტეტში განათლების ადმინისტრირებას სწავლობს. მათემატიკას 2023 წლიდან ასწავლის, მათ შორის IB მათემატიკას ნიუტონის თავისუფალ სკოლაში; 2024-2025 წლებში WHO-სა და NCDC-ის ერთობლივ კვლევაში მონაცემთა ანალიტიკოსად მუშაობდა. მისთვის მთავარია, მოსწავლემ ცოდნა თავად ააგოს და მათემატიკა სამყაროს აღქმის ინსტრუმენტად აღიქვას. ჰობი, ხმის ინჟინერია, პროფესიადაც იქცა: აშშ-ის საელჩოს პროექტში პროდიუსერად მუშაობდა.

თემო ხვედელიძე ბრიტანულ-ქართულ აკადემიაში ფიზიკას ასწავლის IGCSE-ის, IB DP-ისა და ქართული სექტორის IX-XII კლასებში. სწავლების მეხუთე წელია და აქვს IB, IGCSE და AP Physics-ის პროგრამებში მუშაობის გამოცდილება: ევროპულ სკოლაში ფიზიკასა და რობოტიკას ასწავლიდა, ბოლო ოთხი წელი კი EPAM-ში Associate Content Specialist-ად მუშაობდა. თავისუფალი უნივერსიტეტის ფიზიკის სკოლის კურსდამთავრებულია, სამეცნიერო სტატიის ავტორია და 2018 წელს ჰელსინკში ფიზიკოს სტუდენტთა საერთაშორისო კონფერენციაზე ნაშრომი წარადგინა. მისთვის მასწავლებლობა მოსწავლისთვის კომფორტული გარემოს შექმნას ნიშნავს. ჰობით ბილიარდს ნახევრად პროფესიულ დონეზე თამაშობს.